البنت الناعمه والعربجيه

(الفرق بين الناعمه والعربجية)
*اول شيء نبدا فيه الناعمه
نعطيها لون ناعم

اللون الوردي

الناعمه..طبعا وهي نايمه الدبدوبي والارنوبي كلهم في حظنها ما شاء الله صارت الغرفه محل العاب واذا قامت من النوم ما تقوم الا الساعه1 الظهرلابعد واللي يصحيها الشغاله تقومها بالانجليزي..بس انا راح اترجمه لكم..
{يالله مرام قوم ماما في قول قوم}
عادهي تقول اوكي وتجي امها وتصحيها مره ثانيه يا مرام حبيبتي اصحي..
ترد مرايم.. ماماوالله بدري الساعه 1الظهر بدرررري(تدلع هي وخشتها..)
(يقالها توالناس بدري)..طيب ماما من عيوني
قامت البنت من السرير وفتحت الستاره والشبابيك..علشان الغرفه تتنفس ...يااااي..وشغلت موسيقى رومنسيه علشان تروق بنت الحلال وراحت تاخذ حمام محترم وبعد ما تطلع من الحمام و على المرايه تحط من هالكريمات والدعافيس على وجهها

تعرفون شباب لازم تحافظ على البشره خلصت من المرايه وتتجه الان الى الاستشوار وش..وش..وش لحووووول ساعتين عز الله اللي اندمرت هالشوشه... خلصت منه دقت البنطلون الجينز والبلوزه ونزلت تحت تفطر على كاس عصير برتقال... مسويه رجييييم
‏
‏
‏

*نجي للعربجيه
نعطيها لون
{اسود} لايق عليها

..تقوم الساعه 8 الصبح وهي ما ودها تقوم.. وجات امها تقومها..
ياسوير قومي يا مال الحمى لحوووول زين زييييين
...تنفخ بعد..
بس لو تشوفون شكلها وهي نايمه.. كراع هنا وكراع هناك.. لاوكل ثلاث ساعات وهي طايحه من السرير
يجي اخوها حميد(اسمه محمد بس يدلعونه حميد)
ويقومها مره ثانيه ياااااا سوير تقول امي قومي جعلك الموت
ترد سوير..اقول الحين اطلع ولاصكيتك على جبهتك(تقول اصبخه مهب جبهه)هههههههه
ويجي مناحي اخوها الكبير... سوير وجععععع .. ويعطيها ذيك الرفسه اللي خلت عظامها تهلهل
وبعد هالرفسه القويه ... فزت فزه ما يعلمها الا الله
وقالها مناحي..قومي صلحي فطور عشر دقايق الا وهو جاهز زييين
شوفي ابي قرص وخبز..
وقامت بعد جهد جهيد وعلى شتم ولعنت الحي والميت حتى ولد عم جد ابوها ما سلم منها
اعزائي القراء نعود الى الاخت الناعمه..
هذي ما تتغدا الاالساعه 3 ولا 5
لا ولاتتغدى الاعلى رز ابيض مسلوق وسلطه ...تحافظ على الرشاقه يا شباب!!
العربجيه
تتغدا الساعه 12 بالضبط ولا تتغدا الا على كبسه وإذا خلصت ؛ إلا كاس اللبن مراعي متولم عندها تشربه شربه وحده .. !!
الناعمه..
طلعتها تكون من بعد صلاة المغرب(ما تطلع في العصر ياااي تحافظ على البشره؟؟(وش هالبشره)
العربجيه..
تطلع الساعه2 القايله وتدقها كعااااابي لبيت خوالها ..
الناعمه..
تروح العقاريه والمملكه وقبل ما تروح السوق تمر على المشغل علشان تحط ميك..اب سوق (مكياج سوق ما سمعتوا فيه هذا يبدأ من العيون وفوق ياربي لا تبلانا)..ههههههه
العربجيه ..
تروح البطحاء وحراج بن قاسم عشان تلقى العرابجه اللي مثلها

الناعمه
اذا تطلع تطلع مع يارا ولارا> ورولاوفيفي وميمي ومايا وغيرهم
العربجيه
تطلع مع بنات خالاتها وضحى وشقحى ومزنه ومنيره وصيته ونوير وعمشه...

يــــلا

من منكم ناعمه ومن منكم عربجيــــه ؟؟