قصه هيااااط في الطياره

طبعا القصة هياط في هياط يعني مافيه شي صدق
وكمااااان منقوله بس لعيونكم الحلوه




في يوم من الأيام قررت اسافر بالطيارة من جده الى باريس المهم بعد ما خلصت إجراءات السفر وجاء موعد الرحلة حركت على المطار وانتظرت لمن موعد صعود الطيارة وجالس اسولف مع واحد واحكيه عن بطولاتي ومغامراتي المهم انبسط مني وقال يبي يصير خويي سألني وين رايح قلت باريس قال حلو اجل نفس الرحلة بعد دقايق (قصدي ساعات) صعدنا الطيارة طلع كرسيي على الممر وانا من النوع الي اذا ما جلست ع الشباك وفتحت الشباك ما ارتاح في السفر وأنادي المضيف قال معليش ما نقدر محلك هنا والطيارة فل مافيه كرسي فاضي قلت مآبي اجلس هنا ناد لي المشرف بعد ما ناداه كلمته وقلت انا فلان بن فلان مرسول لك من فلان >> طبعا من دون ذكر أسماء منعا للإحراج هع هع
المهم قال لي خلاص ابشر طال عمرك ويجيب لي مقعد فاضي بالدرجة الأولى على الشباك بالصدفة طلع جنب خوينا الي بالمطار طلع واحد واصل المهم جلسنا نسولف شوي الا يجيبون لنا قهوة وتمر ويدلعونا شوي الا يجيبون عصير بعدها جلست شوي الا الطيار لك عليه سواقته ماش وأقوم من محلي وأدق الباب حق كبينة القيادة ويفتح لي مساعد الكابتن قال خير ان شاء الله قلت اقول وخر بس قال وين رايح تعوذ من الشيطان وانا الي اسطره كف واسدحه ارضا وادخل ع الطيار الا هو خايف يقول يرحم أمك لا تخطف الطيارة قلت لا ما بخطفها ولاشي بس ابي أسالك وين وصلنا ؟؟ قال خلاص شوي نوصل الحدود قلت وخر قال وش تبي قلت وخر وبس خير ايش عندك وانا الي اسحبه برقبته وأقومه واستلم القيادة وأصك بذاك الجلنط الي سمعوه اخوياي من مكة وانا الف وارجع على مكة نسيت شنطتي بالبيت من الحماس وادز بالطيارة لمن وصلت مكة واجلس أدور أدور لمن عرفت بيتنا وانا الي اهبط على السطح واخذ المايك (( أعزائي الركاب نظرا للظروف الطارئة سوف نتوقف قليلا وعشان ما تزعلون ولا تنزعجون والله ان تقلطون معنا العشاء جاهز )) وانا الي اسمع لي صوت واحد يقول كثر الله خيرك ما يحتاج تتعب نفسك وارد عليه قلت ابدا العشاء جاهز ننزل نتعشى ونتعوذ من الشيطان المهم وافقوا ونزلنا وتعشينا وأخذت الشنطه وانا الي اطلعهم الطيارة واجلس أعدهم عشان لايكون نسينا احد هنا وإلا هنا وارجع استلم الطاره وادز 5 دقايق وانا على الحدود شوي الا التفتيش واصفط وهو يقول رخصه واستمارة وجوازات المسافرين وانا الي اطلع له بطاقتي لمن شافها وهو يدق لي تحية قال تفضل خلاص مايحتاج وامشي شوي الا اسمع لي صوت تشششششششششش واصفط على سحابه وانزل الا الكفر مبنشر واسأل المضيف فيه استبنه قال لا طيب وش نسوي وأفكر أفكر واخذ الطيارة من أولها الى أخرها وانا رايح جاي أفكر أفكر شوي تخطر لي فكره وأشوف واحد مرتز بثوب وشماغ واخذ عقاله وأحطه بدال الكفر والا طلع مزبوط ويقوم الطيار يسلم علي فرحان ومن زود الفرح نزلنا الركاب جولة سياحية على السحاب وتشوفنا خايفين على الصغار لايطيحون وشبينا النار والسوالف والفله جلسنا نص ساعة بعدها كملنا وتمسك معي الا افحط وانا انطل الطيارة يمين ويسار يمين ويسار وأصك بعقده الا الركاب يصفقون ويصيحون عداك العيب ياشنب وانا الي أتحمس واجلس اقلب الطيارة بالجو شوي الي شايب يدق باب الكبينة يقول يرحم أمك خلاص دخنا قلت عشانك يالشياب خلاص وارجع أنادي الكابتن قلت له كمل الرحلة وارجع اجلس مكاني الا العالم تصفق وتشجع وكل واحد يقول والله ان تجي تجلس محلي وانا اقول لهم لا والله مايصير شوي الا ................ موجود معانا بالطيارة وهو الي يسألني أنت وش تشتغل قلت ابد طالب بالجامعة قال أنت بس تخرج وتعال وظيفتك عندي اختر الوظيفة الي تبيها وانا اقول له يابن الحلال ماسويت شي قال أبدا وظيفتك جاهزة قلت يلا يعطيك العافية المهم رجعت جلست محلي كل شوي الا مضيفه جايه ومضيفه رايحه لدرجة أنهم جابوا لي بلاي ستيشن 3 واجلس العب شوي الا مساعد الكابتن يوم جاني قال الكابتن يبيك وانا اقول له يالله وش يبي اللزقه ذا قال مدري وأروح أشوف وش عنده الا هو يقول تعال شوف ذا جالس يحدني المهم وأقول له وخر بس واستلم الطاره وادخل على هذاك دخله الا هو يأشر بيده يقول خلاص والله ما أعيدها وحتى طلع العلم الأبيض حق الاستسلام شوي الا أشوف لمبات باريس تبرق تبرق وإلا الطيار يصيح قسم بالله انك فنان بالسرعة ذي وصلنا قلت ايه وديتك من طريق مختصر يالفالح وانزل بالطيارة المطار وأصك بعقده وسط المدرج ويوم وقفت الطيارة الى رئيس فرنسا عند الباب ينتظرني انزل وهو الي يعزمني عنده بالقصر وانا اقول والله مرتبطون (مرتبط)عندي أشغالون(أشغال) قال مرتون (مره) مافيها تعالون (تعال) عندي وانا ارسلون (ارسل) الخدمون (الخدم) يخلصون كل شيون (شي) يابن الحلال غيرون بدلون (غير بدل) قال مرتون ( مره) قلت تمون (تم) الله يقويك شوي>> ((طبعا جالسين نتكلم بالفرنسي بس ذي الترجمة الي بين الأقواس )) الا الطيار يقول لي تكفى بالرجعة أبيك ترجع معي وعلى حسابي والله ما تدفع ريال قلت اقول سقها باثنين ولايكثر قال ارجع معه مابقي الا هي
ووصلنا لأرض فرنسا بسلام وسلااااااامتكم


أتمنى تعجبكم